دوشنبه , اپریل 23 2018
کور / خبرونه / نړۍ / ټرمپ به ژر خپل ځواکونه له سوریې وروغواړي

ټرمپ به ژر خپل ځواکونه له سوریې وروغواړي

سپینې ماڼۍ ویلي چې په سوریه کې د امریکا ماموریت نه‎دی بدل شوی او ولسمشر ډونالد ټرمپ به هر څومره ژر چې کېدای شي، امریکایي ځواکونه خپل هېواد ته ورستانه کړي.

سپینې ماڼۍ دغه څرګندونې د یکشنبې په ورځ تر هغه وروسته وکړې چې متحده ایالاتو له خپلو متحدینو، فرانسې او بریتانیا سره پر سوریې د دې هېواد د رژیم له‎خوا د تېرې اوونۍ د مشکوک کېمیاوي برید په غبرګون هوايي بریدونه وکړل.

داسې انګېرل شوې وه چې ګواکې د توغندیو په دغو بریدونو سره امریکا د سوریې په اووه کلنه کورنۍ جګړه کې ډېره ښکېلېږي.

متحده ایالات به په اوس وخت کې خپل ځواکونه له سوریې ونه‎باسي.

خو د سپینې ماڼۍ ویاندې سارا ساندرز په یوه بیان کې وویل چې ولسمشر ټرمپ ډېر واضح ویلي چې دی غواړي هر څومره ژر چې امکان ولري امریکایي ځواکونه له‎دې هېواده وباسي.

د سپینې ماڼۍ ویانده سارا ساندرز

د سپینې ماڼۍ ویانده سارا ساندرز

ساندرز وویل، موږ پتیلې چې د اسلامي دولت ډله یا داعش سخت دریځه ډله به بېخي له‎منځه ځي او داسې شرایط به رامنځته کېږي چې هغه بیا سر را اوچت نه‎کړي.

ساندرز زیاته کړه، موږ دغه‌راز له خپلو سیمه‎ییزو متحدینو او شریکانو هم تمه کوو چې د سیمې د امن او ثبات لپاره پوځي او مالي زیات مسؤلیتونه په غاړه واخلي.

د سپینۍ ماڼۍ د ویاندې له‎دې څرګندونو سره په یوه وخت په ملګرو ملتونو کې د امریکا سفیرې نیکي هیلي وویل چې متحده ایالات به په اوس وخت کې خپل ځواکونه له سوریې ونه‎باسي او زیاته‌یې کړه چې د امریکا مأموریت تر اوسه نه‎دی بشپړ شوی.

په ملګرو ملتونو کې د امریکا سفیرې نیکي هیلي

په ملګرو ملتونو کې د امریکا سفیرې نیکي هیلي

هیلي وویل، په سوریه کې د امریکا د مأموریت د بشپړېدو لپاره درې هدفونه ټاکل شوي:

  • د داعش ماتول.
  • د کیمیاوي وسلو خوندي کول چې هغه بیا په داسې بڼه ونه‎کارول شي چې په سیمه کې زموږ ملي ګټې زیانمنې کړي.
  • د برلاسي‎توب داسې یوه فضا چې وکولای شو په سیمه کې د ایران کړه وړه له نږدې وڅارو.

هیلي وویل، موږ به تر هغو له سوریې ونه‌وځو چې دغه درې هدفونه ترلاسه شوي نه‎وي.

په عین حال کې د فرانسې ولسمشر امانوئل مکرون ویلي چې ده ولسمشر ټرمپ ته قناعت ورکړی چې په سوریه کې د اوږدې مودې لپاره ځواکونه پرېږدي.

مکرون وویل، ۱۰ ورځې مخکې ټرمپ غوښتل چې له سوریې ځواکونه وباسي، خو موږ نوموړی په‎دې قانع کړی چې ځواکونه هلته وساتي.


Source link

خپرندوی: خبرخونه

د افغان ويبپاڼې رضا کاره ډلې پرمټ د يوې انلاين خبر خونې په بڼه له بېلابېلو ولايتونو څخه خبرونه او معلومات خپريږي. تاسو هم کولی شئ، چې په کې برخه واخلئ، خبرونه او بېلابېل معلومات خپاره کړئ؛خو له غړيتوب وړاندې د ويبپاڼې تګلاره ولولئ.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *